盤房來料丨港股反彈乏力 二萬六阻力重重

伊朗媒體報道，美國提出暫時豁免對伊朗石油制裁，只係美方官員否認。不過侵侵喺社交媒體貼文，話應卡塔爾等國家要求，美方押後原定於周二攻擊伊朗計劃，消息令市場憧憬美伊談判有望再見進展，國際油價周一從高位回軟，帶動美股道指止跌回穩。不過科技股有回吐，三大指數個別發展，美市收市，道指報49686，升159點或0.32%；標指跌5點或0.07%，報7403；納指跌134點或0.51%，報26090。市場風胃納大降，加密貨幣「一哥」比特幣一度跌3.1%，至76029美元超過兩周低位。

放咗成個星期假，噚晚睇返啲美股，因為硬碟製造商Seagate管理層表示，新建工廠「耗時過長」，言論令本來炒到估值已高嘅記憶體晶片股出現較大幅度回吐，由於市場憂慮產能唔能夠滿足激增需求，引發相關板塊被拋售。Seagate急挫6.9%，美光亦跌6%，阿Man一直等緊美光回調搵位上車，結果急不及待喺715美元已接咗一注，其後再喺685及665再分別放咗買盤，結果盤後時段全部接貨，手上三注平均價大約688美元左右，先用個650美元做防守，如果跌穿，或者要落返600-620美元，三注只係小注怡情，美光低位無貨底，會嚴守止蝕。另一隻噚晚出擊買咗貨嘅係GOOG，395美元先買一注，下一注打算喺380美元買入，失守370美元，可能要落到330先再有支持。

放假前減咗唔少炒開嘅股份，CRWV講過見105-110左右會補返貨，結果噚晚就出手，105買咗一注，另一注竟然喺100元接到，防守位睇位個90-93美元，最好當然唔好再穿100大關。NBIS又係已經喺189元落晒車，呢幾日真係曾低見173美元水平，無穿到170美元，就喺180美元買返，防守位用返個170美元先。ALAB又係畀到個185-195美元上車，195美元接返半注，185美元個買盤就影到無，周五上過230美元樓上，但都無落車，暫時個防守位要推高去180美元。暫時短炒撈返CRWV同ALAB，GOOG再入返啲貨，另外想吼返隻INTC，今晚再睇下個100-105美元守唔守。留意Nvidia本周稍後公布業績，暫時防守位210-215美元。

至於NQ噚晚彈到最後一個阻力29400回頭，債息高企下，加上唔少之前熱炒嘅科技股都調整，NQ亦由29400回返去噚晚個分水嶺29000附近，今晚NQ分水嶺不變喺29000，支持28900/28800/28700，至於阻力方面29100/29200/29300，睇下今晚個納指會唔會收窄返波幅，估計個range大約係28800至29200之間，唔會下下再做個500點波幅以上。

至於港股昨日延續上周五跌勢，恒指低開123點，報25838經已係噚日高位，大市低開低走，最多跌至25505，一度失守250日線，其後跌幅收窄至287點，報收25675，250日線失而復得，但成交額增至2927億元，當中北水錄得淨沽出億元，反映跌市下沽壓逐步增加。及至夜期時段，曾隨美股反彈至25700水平，可惜其後納指走軟，ADR及夜期再度回落，夜期重返25600水平之下，以期指計再失250日線。不過今早黑期回穩，恒生指數高開18點，早段曾升170點至25845半日高位，中午升幅收窄至98點，報收25774，剛好落喺50日線。

目前美伊局勢再度變得唔明朗，侵侵再度向伊朗發動攻勢機會升溫，油價又持續高企，紐約期油一直處於100美元上方，加上環球債息上升，接連創新高嘅美股及日股等股市開始調整，難免影響整體投資氣氛。雖然港股目前估值一啲都唔貴，但正因為指數權重股份，完全食唔正AI炒軟件同算力呢兩大板塊條水，咁港股只有繼續落後。

暫時250日線大約喺25600水平，噚日同今日總算守住，呢個支持位最好咪再失，留意除25600為250水平外，25500亦為重要支持，一旦失守，料向下回補4月8日所遺下上升裂口，底部為25254為下一重要支持，失守或再度考驗25000心理關口支持。至於反彈阻力方面，首個反彈阻力為25750-25800，即50日線水平，下一阻力為25950-26050，約30日線水平，料25150即20日線及100日線滙聚區阻力更大。暫時港股仍無法走出上落市格局，不過一旦跌穿25000水平，則有機會向下突破，而技術走勢短線已見超賣，或短線反彈，但港股未能重返所有移動平均線企穩，則無法扭轉調整弱勢。

麥狄文

(徐狄怡‧證監會持牌人)